Kinsa kaha nilang Butler ug Jokic?

Target sa Heat ikaupat nga kampeyonato; unang NBA Title sab para sa Nuggets

CEBU, Philippines — Kinsa kaha nilang Jimmy Butler sa Miami Heat ug Nikola Jokic sa Denver Nuggets ang moisa sa Larry O’Brien Trophy aning nagka-kulbahinam nga NBA Finals.

Karong adlawa mao ang Game 3 tali sa duha nga nagtabla na sa 1-1 standing human nga nakabawos ang Heat niadtong Lunes batok sa Nuggets nga nakauna na sa seven-game series niadtong Huwebes sa nakalabay’ng semana.

Ang duwa nahitabo tanan sa balwarte sa Nuggets. Napildi man ang Heat, apan sa pagbawi nila sa Game 2, nakapahinumdom kini sa kun unsa ka gahi ang maong koponan.

Ang sunod nga duwa sa Game 3 ug Game 4 adto na sab himuon sa teritoryo sa Heat.

Ang Heat nagtinguhang makuha ang ika-upat niining kampeyonato, samtang ang Nuggets sukad-sukad wala pa makahikap niini.

Apan bisan pa man sa eksperiyensiya sa Heat sa finals, di gihapon kakumpiyansahan ang Nuggets.

Dili maayong kumpiyansahan ang maong koponan tungod kay sila maoy kampeyon sa tibuok Western Conference.

Kun basihan ang ilang rekord, ang Nuggets maoy dunay labing maayong rekord sa West Conference niini nga season, mao usab kini nakapahimo kanilang paborito sa playoffs.

Samtang ang Heat naa lang sa No. 8 seed sa Eastern Conference ug miagi pa og duha ka play-ins aron makaabot sa finals. Hinuon bisan og miagi sila sa buslot sa dagom, napamatud-an sa Heat nga sila maoy pinakamaayo sa Eastern Conference mao nga sila maoy naa karon sa finals batok sa Nuggets.

Atol sa Game 2 gisakmit sa Heat ang kadaugan gikan sa Nuggets diha mismo sa ilang tugkaran 111-108. Napapas ang homecourt advantage sa Denver.

Napakita sab sa Heat nga silang tanan dunay abilidad para motampo para sa koponan, ebidensiya niini ang pagkabahin-bahin sa iskor tali sa mga players dili lang gikan kang Butler kondili hasta sab sa uban nilang kauban.

Duna hinuoy mga nanggawas nga estorya nga kwestyonable ang pagdaog sa Heat sa Game 2 tungod kay dunay duha ka tawag sa referees sa second half nga sa tan-aw sa mga fans sayop.

Tungod sa maong mga tawag nakalibre og 5-puntos ang Heat. Kini nga tawag mao ang pagpasa ni Butler sa bola gikan sa perimeter ngadto ni Gabe Vincent  kinsa nakaitsa og tres. Matud pa, ‘out of bounds’ na si Butler apan wala kini gitawgan sa referees.

Ang ikaduhang tawag nahitabo 4:25 minutos nalang ang nahibilin sa 4th quarter sa dihang si gibabagan ni Bam Adebayo si Jamal Murray nga mi-drive padung sa basket.

Ang tan-aw sa uban goaltending kadto nga violation ug dapat puntos kadto para sa Nuggets.

Karon nga nakatabla ang Heat, 1-1, balik sa uno ang duha. Apan usa ray sigurado, ang ekperiyensiya sa  Heat ug ang kaandam nila pagkamas aron modaog bisan sa malisod nga sitwasyon sa nangagi nilang mga kadaugan sa tibuok season maoy ilang gamiton aron pagpuno pa og usa sa tulo nila ka kampeyonato.

Apan sigurado sab nga di magpalupig ang Nuggets nga hangtud karon wala pa sukad makakuha sa idlas nga NBA title sukad sa pagkamugna sa ilang koponan. — IBM