Banchero miagak sa Magic batok Sixers
CEBU, Philippines — Si Paolo Banchero mipabuto og 29 puntos, siyam ka rebounds ug tulo ka assists sa dihang gipakuratan sa Orlando Magic ang Philadelphia 76ers, 119-109, sa NBA kagahapon didto sa Wells Fargo Center sa Philadephia, Pennsylvannia.
Mihimo sab og kasikas ang managsoong Franz ug Moritz Wagner, nga nagkumbinar og 41 puntos alang sa Magic nga madasigong mibangon human malubong og 21 puntos sa first-half dayon na ngadto sa pagpahagba sa inilog nga Sixers.
Ang Magic mipabuhagay og 42 puntos sa ikatulong kuwarter sa wala pa gitak-op ang duwa pinaagi sa nagkayong 19-8 run aron tuldokan ang impresibo nilang pagbalitok.
Dako sab og naambag si Markelle Fultz uban ang 12 puntos ug 10 ka assists ingon man si Wendell Carter Jr. nga mikimada og 12 puntos alang sa Magic.
Si Joel Embiid maoy nangu sa Sixers bitbit ang 30 puntos samtang sila si James Harden ug Tobias Harris mitali og 17 puntos matag usa sa pilderong kawsa.
Sa laing duwa, si Kyrie Irving mikadlit og 26 puntos sa dihang gibuntog sa Brooklyn Nets ang Los Angeles Lakers, 121-104.
Wala hinoon miduwa ang duha ka mga bitoon sa Lakers nga sila si LeBron James ug Anthony Davis.
Gilampaso sa Nets ang Lakers sa katapusang kuwarter, 36-22, nga maoy nahimo nilang taytayan ngadto sa kalamposan.
- Latest