Davis mipabuto'g 55 puntos, Lakers gipaksit ang Wizards
CEBU, Philippines — Si Anthony Davis mipabuhagay og 55 puntos ug 17 ka rebounds aron pangulohan ang Los Angeles Lakers ngadto sa 130-119 nga pagpakaging sa Washington Wizards sa NBA kagahapon didto sa Capital One Arena.
Nahimong mas espesyal ang gabii ni Davis gumikan kay mikab-ot man siya og dungog isip unang player sa Lakers sukad ni Kobe Bryant niadtong 2013 nga mikadlit og dili mominus 40 puntos sud sa duha ka sunod-sunod nga duwa.
Mihimo sab og kasikas si LeBron James uban ang 29 puntos ingon man sila si Lonnie Walker IV nga miamot og 20 puntos alang sa Lakers nga miposte sa ikatulo nilang sagunson nga daog ikawalo sa kinatibuk-an sa miagi nilang 10 ka duwa.
Sa laing aksiyon, ang Boston Celtics dali nga nakabawi sa miagi nilang kaparotan sa Miami Heat human gibugha ang Brooklyn Nets, 103-92, ubos sa pagpangu nilang Jaylen Brown ug Jayson Tatum nga nagkumboya'g 63 puntos.
Didto sa New Orleans, si Jose Alvarado milansang og walo ka 3-pointers dayon na ngadto sa pagkadlit og career-high 38 puntos sa dihang gituhak sa Pelicans ang Denver Nuggets, 121-106.
Sa San Antonio, yanong gikulata sa Phoenix Suns ang Spurs,133-95. Si Deandre Ayton mipupo og 25 puntos ug 10 ka rebounds samtang sila Devin Booker ug Mikal Bridges mihipos og 20 puntos matag usa alang sa Suns.
Sa ubang mga resulta, ang Portland Trail Blazers mipaksit sa Indiana Pacers, 116-100, ang Memphis Grizzlies mikastigo sa Detroit Pistons, 122-112, samtang ang Sacramento Kings mi-ihaw sa Chicago Bulls, 110-101.
- Latest