Garing nanghawod sa midget B
CEBU, Philippines — Giwani sa Garing ang Tolotolo, 64-57, sa tinagakay nilang kampiyonato aron birahon ang korona sa midget category B sa 11th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Si Kent Harry Encabo maoy bida sa Garing uban ang 20 puntos. Nakakuha siya og dakong suporta gikan nilang Charles Alivio ug Ashley Mangilaya nga nagkumboya'g 18 puntos.
Sikit kaayo ang ilang kumbati sa first half apan ang Garing mibirada og maayo sa ilang opensiba sa katapusang duha ka kuwarter aron pag-angkon og siyete puntos nga kadaogan.
Si Steve Salipot milansang og 17 puntos, si Jhon Bihag mi-iskor og 13 samtang si Brent Bihag dunay 10 puntos sa pilderong Tolotolo.
Sa laing resulta hinoon, ang Tolotolo mipakaging sa Polog, 97-91, aron pag-abante sa SK category B final.
Si Jay Harold Herbito mipaulbo og 28 puntos alang sa Tolotolo, samtang sila si Jessie Bathan ug Stephon Gonzales mitampo og 15 puntos matag usa. Si Kim Shanon Capangpangan mibomba og 29 puntos, si Florence Alipan mi-iskor og 22 samtang si Ben Carlo Alin midugang og 12 puntos apan nakawang ang ilang paningkamot alang sa Polog.
- Latest