Lamac sud sa senior A final sa Alegado Cup
CEBU, Philippines — Si Joseph Cabahug mipabuhagay og 33 puntos sa dihang gi-sweep sa Lamac ang Tayud, 94-85, sa ilang best-of-three semifinal series aron pag-angkon og luna sa kampiyonato sa senior category A sa 11th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Miamot si Jaycob Baguio og 15 puntos alang sa Lamac nga kontrolado kaayo ang duwa sukad sila misutoy ngadto sa sayong 23-17 nga labaw. Giinat sa Lamac ang ilang bentaha ngadto sa 47-36 sa halftime ug wala na sila molingi pa sukad niadto.
Si Gerald Fernandez mitali og 24 puntos samtang sila si Arnel Momo ug Franco Te nagkumbinar og 23 puntos sa pilderong Tayud. Sa midget category A hinoon, giunhan sa Tayud ang Jugan sa ilang best-of-three semis pinaagi sa 103-69 nga demolisyon. Si Xeemon Cuyos mikadlit og 21 puntos samtang sila si Xisco Cuyos ug Miko Mata nagkumbinar og 31 puntos alang sa Tayud nga mi-abante og 12 puntos, 30-18, human sa unang kuwarter.
Nakasikit pa ang Jugan ngadto sa otso puntos human sa tulo ka kuwarter, 55-63, apan ang Tayud mitak-op sa duwa pinaagi sa makalisang nga 40-14 rally aron pagkab-ot og 34 puntos nga masaker.
Si Zairyl Pilapil mitapos uban ang 15 puntos, si Shan Sarno mi-iskor og 15 samtang si Lee Michael Dahil miamot og 12 puntos sa naminghoy nga Jugan.
- Latest
