Pulpogan, Casili nakauna sa semis
CEBU, Philippines — Giunhan sa defending champion Pulpogan ug Casili ang tagsa-tagsa nila ka mga karibal sa best-of-three semifinal series sa 11th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Ang managsoong Russel ug Rexon Moneva nagkumboya'g 32 puntos samtang si Cris Perolino midugang og otso puntos sa dihang gimakmak sa Pulpogan ang Jugan, 104-89, aron pagtikang ngadto sa usa na lang ka daog gikan sa senior category A final.
Wala na molingi pa ang Pulpogan sukad sila mibulhot ngadto sa satyong 32-18 nga labaw.
Sila si Alamer Ibale, Benhur Villamor ug Erwin Brigole nagkumbinar og 39 puntos sa pilderong Jugan.
Sa midget category A, ang Casili mitumba sa Pulpogan, 99-88, aron pagpanoktok niini sa pultahan sa final.
Si Jatt Sabellana maoy nangu sa Casili uban ang 24 puntos. Gisundan kini ni Kent Encaba nga dunay 20 puntos samtang si Clyde Alilin miamot og 12 puntos.
Sa SK category A, gitagak sa Pulpogan ang Danglag, 86-76, luyo sa gikaintapang trianggulo nilang Rovello Robles, Raymundo Osabel, ug Paolo Dalumpines nga miaharos og kinatibuk-ang 53 puntos. Usa na lang ka dog ang gikinahanglan sa Pulpogan aron masud sila sa semis.
- Latest
