'Unang hunat, unang kiat' UP Cebu dunay misyon

“Good luck to our opponents!”

CEBU, Philippines — Mao kini ang madagisong mensahe ni University of the Philippines (UP) Cebu Chancellor Atty. Leo B. Malagar human niya gipangulohan ang oath-taking sa mga miyembro sa nagkadaiyang varsity teams sa tunghaan ning bag-ohay pa lamang.

Sa pag-umol ning maong programa, tuyo sa UP Cebu nga buhion ang legasiya sa tunghaan nga makahulma og mga varsity teams nga midominar sa mabulokon nilang kasaysayan.

Laraw nilang makakaplag ug makabansay-bansay og mga estudyante aron mamahimong dekalibreng mga atleta nga morepresenta sa ilang tunghaan sa mga dagkong kompetisyon sa umaabot.

Miabot ngadto sa 250 ka mga estudyanteng atleta sa UP Cebu ang pormal nga gipaila-ila sa entablado sa hawanan sa tunghaan atol sa bonggang seremonyas sa ilang paglusad nga gitambongan ni CESAFI commissioner Felix "Boy" O. Tiukinhoy, Jr. sa miaging semana.

Tuyo nga milupad gikan sa Manila aron paghatag kanila og dugang motibasyon sa makasaysayanon nilang paglawig sa CESAFI mao ang pipila ka mga sakop sa defending UAAP champion UP Fighting Maroons nga gilangkoban nilang Carl Tamayo, Jancork Cabahug, CJ Cansino, Maimai Cagulangan, CJ Catapusan, ug Felixberto Jaboneta, ug kanhi PBA player nga si Paul Desiderio.

Didto sab sila si UP Maroons head coach Bo Perasol, Dean Francis Carlos Diaz sa UP College of Human Kinetics, kanhi UP volleyball coach Godfrey Okumu, ug mga pipila ka CESAFI coaches.

Sa labing unang higayon, ang UP Cebu mokumbati sa basketball, football, badminton, table tennis, swimming, chess, ug dancesport sa giatngan nga pagbalik sa CESAFI nga gikatakda karong Oktubre 15 didto sa Cebu Coliseum.