Cowboys giusban ang Sarok Weavers

CEBU, Philippines — Ang Bukidnon Cowboys mipatilaw sa defending champion Consolacon Sarok Weavers sa labing una niining pilde pinaagi sa sikit nga desisyon, 61-58, sud sa overtime sa 2022 Pilipinas Super League (PSL) 21 Under-VisMin leg niadtong Huybes sa gabii didto sa Cordova Sports Complex sa Cordova, Cebu.

Kahinumduman nga ang Cowboys mao sab ang mitunol sa Sarok Weavers sa una niining pilde sa unang komperensiya sa PSL niadtong Abril 8.

Si Jayvee Pascua milansang sa krusyal niyang 3-pointer sa nahibilin nga punto nuybe segundo sa dugang singko minutos sa duwa aron pangulohan ang makapaisa'g balahibo nga kadaogan sa Cowboys batok sa Sarok Weavers.

Sulagma kaayo nga mao lamang kadto ang 3-point shot sa Cowboys sa tibuok duwa.

Si Pascua mitapos uban ang 11 puntos, siyam ka rebounds ug duha ka assists.

Ang alas nilang si Ivo Salarda mikadlit og double-double nga 14 puntos ug 15 ka rebounds alang sa Cowboys nga nakapuwersa og triple tie sa kinatas-ang bahin sa liderato uban sa Sarok Weavers ug Davao Occidental Dreamers bitbit ang managsamang 5-1 win-loss records. Si Matthew Flores maoy nangu sa pilderong Sarok Weavers uban ang 18 puntos ug 12 ka rebounds. Si Rovello Robles mipupo og 10 puntos ug 11 ka rebounds apan nahoyhoy sab ang abaga gumikan kay napakgang sa lima ka sagunson nilang daog.

Sa laing duwa, sila si AJ Sacayan, Aeron Aparicio ug Juhan Torion mikimada og 12 puntos matag usa sa dihang gilampaso sa Asturias Corn Ranchers ang OCCCI-Ormoc Sheermasters, 78-66, alang sa ikaduha nilang daog sud sa unom ka duwa.