CEBU, Philippines — Ang Asian Orthopedics 2014 ug Cebu Landmasters 2003 milansang sa ikaduha nilang sagunson nga daog sa Sacred Heart Ateneo Alumni Basketall Association (SHAABAA) Season 25 didto sa Magis Eagles Arena sa Sacred Heart School-Ateneo de Cebu sa Barangay Canduman, dakbayan sa Mandaue.
Si Lucky Ecarma mipaulbo og 33 puntos uban ang 16 ka rebounds ug tulo ka assists samtang si Jair Igna midugang og 18 puntos, walo ka rebounds ug tulo ka assists alang sa Asian Orthophedics 2014 nga nakaipsot sa UNAHCO 2022, 73-70, aron angkonon ang sayong liderato sa Division C bitbit ang 2-0 nga bentaha. Si Uriel Avila mihipos og 25 puntos, walo ka rebounds ug upat ka assists sa pilderong Batch 2022.
Sa laing duwa sa Division C, si Rendell Senining mipabuhagay og 33 puntos, 11 ka rebounds, walo ka assists ug duha k steals sa dihang gilampornas sa MDP Customs Brokerage 2013 ang Casa Mira 2021, 90-66.
Si Ar-G Araw-Araw midugang og 20 puntos, tulo ka rebounds, lima ka assists ug duha ka steals samtang si Fletcher Galvez miamot og 16 puntos ug pito ka rebounds sa dominante kaayong Batch 2013. Ang Batch 2021 nasugamak sa ikaduha nilang pilde bisan og nakapasol og 22 puntos, 14 ka rebounds ug tulo k assists gikan ni Josiah Gideon Villamayor. Sa Division B, ang Cebu Landmasters 2003 milampaso sa Marjaztin Glass Trading & Construction 2008, 89-76, aron pagpabiling way pilde sud sa duha ka duwa.
Si Justin Russ Huang mitapos uban ang 19 puntos walo ka rebounds, tulo ka assists ug tulo ka steals, si Ryan Adrian Lopeña ug Carlo Alerta dunay 17 puntos matag usa samtang si Daryle Tan mikimada og 15 puntos, pito ka rebounds ug upat ka assists alang sa Batch 2003.
Sa laing aksiyon, si Franco Te mipupo og 24 puntos ug 11 ka rebounds samtang si Christopher Consunji midonar og 18 puntos, tulo ka rebounds ug tulo ka assists sa dihang gipayaka sa 04 the Win 2004 ang Starkwood Properties 2009, 75-52, alang sa una nilang daog.