Team Kobe, S.I.V pabiling way pilde sa Hoops Arlon Cup

CEBU, Philippines — Padayong miratsada ang Team Kobe ug S.I.V aron pagpabiling way pilde sa Hoop Nation Arlon Cup Season 1 niadtong weekend didto sa City Sports Club-Cebu gym.

Nagmangtas na sab si Jonas Mejos nga mipaulbo og 27 puntos uban ang 15 ka rebounds aron pangulohan ang Team Kobe ngadto sa 76-62 nga paglampaso sa I.28 Realty.

Si Mejos duna say upat ka blocks alang sa Team Kobe, nga miinat sa ilang labaw sa East Division standings bitbit ang perpektong 7-0 record.

Sa laing bahin, si Ralph Belarmino mitagak og 25 puntos, siyam ka rebounds ug duha ka assists sa dihang gilat-an sa Simple Blends ang Brothers, 76-50, aron inaton ang ilang marka ngadto sa 4-2.

Didto sa West Division, ang S.I.V mipakaging sa Cebuanos, 63-54, alang sa ikalima nilang sagunson nga daog.

Si Jezreel Padilla mipupo og 15 puntos ug 13 ka rebounds alang sa S.I.V nga nakigsawo na karon sa DMY Events sa liderato sa West uban ang parehong 5-0 nga baraha.

Sa laing resulta, gimasaker sa Triple M ang Letsgo!, 79-49, alang sa ikaduha nilang daog sud sa lima ka duwa. Si Gil John Recimo hapit makarehistro og triple-double sa Triple M uban ang 24 puntos, 10 ka rebounds ug siyam, ka assists.