NM Enriquez nakasagunson og daog sa CEPCA weekly

CEBU, Philippines — Sa ikaduhang sunod-sunod nga higayon, gidominar ni National Master Rogelio Enriquez, Jr. ang senemanang online tournament sa Cebu Executives and Professionals Chess Association (CEPCA).

Si Enriquez, ang bugtong four-time grand champion sa CEPCA sa wala pa ang pandemiya, mao na sab ang nanghawod sa All-Cepcans category.

Ang sakop sa Toledo City Trojans sa Professional Chess Association of the Philippines (PCAP) mihuman sa 11-round Swiss system competition bitbit ang kinatas-ang 9.5 puntos aron sakmiton ang titulo.

Si International Arbiter Linky Yap nalandig sa ikaduhang puwesto uban ang 9.0 puntos samtang si Jimmy Ty Jr. mikadlit og 8.5 puntos aron pagpahiluna sa ikatulong dapit.

Naglangkob sa Top 6 sila si Jonathan Canque, Rosendo Yamyami, ug Maria Kristine Lavandero nga dunay 6.0 puntos matag usa.

Sa laing bahin, si Sheila Khan Sepanton maoy milugwa nga rayna sa Cepcans B/Ladies division uban ang 34 puntos.

Ang 29-anyos nga si Sepanton kanhi Board 1 player sa Central Philippine University (CPU) varsity chess team sa Iloilo City sa dihang nagtungha pa siya sa kolehiyo. Kasamtangan siyang nagpuyo sa dakbayan sa Lapu-Lapu. Si Dr. Leo Lofranco mitapos sa ikaduhang dapit bitbit ang 24 puntos ug gisundan kini ni Archt. Filemon Kapuno III nga dunay 22 puntos. Sila si Jonard Labadan ug Nicanor Cuizon maoy nagkumplato sa Top 5. Ang kaluhang torneyo nahimong posible tungod sa supporta ni UK-based Cepcan Nolan Coca.