Westbrook nakatabla sa rekord ni Robertson

CEBU, Philippines — Nakatabla na si Russell Westbrook sa NBA record nga napatik ni Oscar Robertson alang sa kinadaghanang "triples-doubles" uban ang 181 dihang mikulit siya og 33 puntos, 19 ka rebounds ug 15 ka assists alang sa kadaogan sa Washington Wizards batok sa Indiana Pacers kagahapon didto Bankers Life Fieldhouse sa Indianapolis, Indiana.

Dili hinuon sayon ang kadaogan sa Wizards kay miagi pa kini og overtime ug ang duha ka free throws ni Westbrook sa himalatyong segundos maoy nakapukling sa Pacers sa iskor nga 133-132.    

Nabaraw sab ni Westbrook ang katapusang itsa sa Pacers.

Si Westbrook aduna na'y 35 ka triple-double niini nga season ug mo-average og usa ka triple-double sa ikaupat ka higayon.

Si Bradley Beal miburak og 50 puntos aron pangulohan ang opensa sa Wizards nga misaka sa ikasiyam nga dapit sa Eastern Conference.

Gipangulohan sab ni Domantas Sabonis ang Pacers pinaag sa iyang 30 puntos, 13 ka rebounds ug 13 sab ka assists, samtang si Caris LeVert mitikdol og 35 puntos ug 14 ka rebounds.