MJAS-Talisay City mikompleto sa 5-0 sweep sa VisMin Cup
CEBU, Philippines — Ang MJAS Zenith-Talisay City Aquastars milubong sa Tabogon Voyagers, 85-65 aron pagkumpleto og 5-0 sweep sa unang hugna sa eliminasyon sa 2021 Chooks-to-Go Pilipinas VisMin Super Cup-Visayas leg didto sa Alcantara Civic Center sa Alcantara, Cebu.
Abante lamang og singko puntos sa halftime, 39-34, ang Aquastars kalit lang nga nagmangtas sa ikatulong kuwarter diin ilang gilabhan ang Voyagers, 28-10 aron pagpaburot sa ilang labaw ngadto na sa 67-44. Miabot pa gani ang ilang labaw ngadto sa 28 puntos, 83-55 sa himalatyong segundos sa duwa.
Sila si Patrick Cabahug ug Egie Biy Mojica maoy nangu sa Aquastars uban ang 13 puntos matag usa. Misalida gilayon si Gayford Rodriguez sa labing una niyang duwa sa liga uban ang 18 puntos ug lima ka rebounds, apan nakawang ang iyang paningkamot kay ang Tabogon nakatilaw sa ikatulo niining pilde sud sa lima ka duwa.
Sa laing aksiyon, ang KCS Computer Specialist-Mandaue City mi-eskapo uban ang 77-66 nga kadaogan batok sa ARQ Builders Lapu-Lapu City Heroes.
Si Gryann Mendoza mikadlit og 19 puntos, samtang si Rhaffy Octobre midugang og 13 puntos alang sa KCS-Mandaue nga nagsolo na karon sa ikaduhang dapit sa liderato uban ang 3-1 win-loss record. Ang ARQ Lapu-Lapu natagak ngadto sa 2-2.
- Latest
