Super Cup Fiasco gab chairman makigtagbo sa team owners

CEBU, Philippines — Makigtagbo ang tsirman sa Games and Amusements Board (GAB) nga si Abraham 'Baham' Mitra sa tanang team owners nga apil sa Pilipinas VisMin Super Cup karong buntag aron palawman pa ang pagtuki sa mga sirkumstansiya luyo sa kataw-anan nga duwa tali sa Siquijor Mystics ug sa ARQ Builders Lapu-Lapu City Heroes nga kadawat og pagsaway ug nakapapungot sa mga tawo sa social media, bisan ang mga magduduwa sa PBA ug sa mga iladong personahe sa paugnat sa kusog.

Ang kontrobersiyal nga duwa niadtong Miyerkules sa hapon, Abril 14, gihunong sa halftime diin ang Lapu-Lapu Heroes labaw og 14 puntos, 27-13. Ang "technical issues" maoy gihimong rason sa paghunong sa duwa.

Bisan pa,  ang salikwaot nga duwa nakamansa sa dili katuohan nga mga sipyat sama sa air-balled free throws, sayon nga lay-ups ug turnovers.

Sa stats sheet, ang Siquijor miiskor lang og singko puntos sa first quarter ug otso sa second period, samtang Lapu-Lapu aduna la'y kuwatro puntos atol sa ikaduhang kuwarter.

Daghan sab kaayo og sipyat ang duha ka kampo gikan sa free throws diiin ang Siquijor nasipyat sa tanang 10 nila ka itsa gikan sa free throws, samtang ang Lapu-Lapu nakapasud lang og upat sa 19 ka itsa.

Ang VisMin  Super Cup management mihimo og dinaliang aksiyon sa maong hitabo ug mipalagpot sa tibuok koponan sa Siquijor Mystics gikan sa labing unang propesiyonal nga liga nga nagbasi sa habagtang mga probinsiya human nasuta nga ilang gituyo og hatag ang duwa ngadto sa Heroes.

Wala sab maka-eskapo ang Lapu-Lapu Heroes sa  kaligutgot sa liga, dihang ang uban sa ilang mga magduduwa ang gipahamtangan og P220,00 sa kinatibuk-ang multa.

Si Rendell Senining, kinsa misuway og itsa sa gamit ang wala ka kamot sa unang free throw ug tuo sa ikaduha, gisuspenso sa nahabiling nga season ug gipakapinan pa og P15,000 nga multa.  

Sila si Jojo Tangkay, Reed Juntilla, Monbert Arong, Dawn Ochea ug Ferdinand Lusdoc, uban sa ilang head coach nga si Francis Martin Auquico, suspendido sab sa first round sa torneyo. Ang nahisgutang mga magduduwa gipamulta sab og P15,000 matag usa, samtang si  Auquico makamulta og P30,000.Ang iyang assistants nga silang Jerry Abuyabor, Alex Cainglet, John Carlo Nuyles, Hamilton Tundag ug Roger Justin Potot  gisagpa og P20,000 nga multa matag usa.

"The Super Cup as a league is self regulating that is why nandiyan na ang kanilang banning and suspension," matud pa ni Mitra sa iyang reaksiyon sa gipakanaog nga hukom sa VisMin Super Cup sa pagpangulo ni Chief Operating Officer COO Rocky Chan. "On our part, we will conduct a deeper investigation and give everyone due process. That is why we will have a meeting with all team owners Saturday morning. I can't say what is going to happen because I don't want to pre-empt everything. Let's just wait and see for the time being."