Talisay, Lapu-Lapu 2-0 na sa VisMin Super Cup

CEBU, Philippines — Ang MJAS Zenith-Talisay City Aquastars ug ARQ Builders Lapu-Lapu City Heroes mikadlit sa ikaduha nilang sagunson nga daog sa Visayas leg sa labing unang Pilipinas VisMin Super Cup Visayas leg didto sa Alcantara Civic Center sa Alcantara, Cebu.

Si Jaymar Gimpayan mipabuto og 25 puntos uban ang 10 ka rebounds sa dihang gilumsan sa Aquastars ang KCS-Mandaue City Computer Specialists, 77-57.

Midugang si Val Acuña og 12 puntos alang sa Aquastars nga dominado kaayo ang duwa gikan sa pagsugod.

Igo lamang nakasikit ang KCS sa iskor nga 17-25 gumikan kay ang Talisay milusad og  13-3 run aron pagposte og 18 puntos nga bentaha sa halftime, 38-20.

Nakapaduol na sab ang KCS, 36-44, apan mibirada sab dayon ang Aquastars aron inaton og balik ang ilang labaw ngadto sa 58-43. Misamot pa ang kainit sa Talisay dayon na sa pagpaburot sa ilang labaw ngadto sa 74-54 sa nahabilin nga 1:10 sa duwa.

Sa laing bahin, si Reed Juntilla mibubo sa tanan niyang 12 puntos sa nagkayong ratsada sa ikatulong kuwarter nga maoy nagtuboy sa Lapu-Lapu Heroes ngadto sa 67-57 nga pagpakaging sa Dumaguete Warriors.

Ang Warriors miabante pa og kuwatro puntos, 34-30, apan igo lang diay sila gipatambok gumikan kay si Juntilla mipasiugda og hagpok nga 12-0 run nga nakahatag sa Heroes og 46-37 nga labaw padung sa final 10 minutes sa aksiyon.  Nakasikit kadiyot ang Warriors, 45-50, apan ang Aquastars miresbak aron pagrehistro og 11 puntos nga bentaha, 61-50. Wala na makabawi pa sukad niadto ang Warriors.

Gawas ni Juntilla nga mibira sab og upat ka rebounds ug tulo ka assists, mibida sab si Ferdinand Lusdoc uban ang 14 puntos ug tulo ka rebounds alang sa Heroes ug ingon man si Jerick Cañada nga mitampo og nuybe puntos, walo ka rebounds ug unom ka assists.