VisMin Super Cup MJAS, KCS masentro sa pagbukas sa liga
CEBU, Philippines — Ang MJAS Zenith-Talisay City Aquastars ug ang KCS-Cebu City Computer Specialists mao unya ang masentro dihang sangkaon nila ang ilang tagsa-tagsa ka kaatbang sa makasaysayanong season-opening games sa Visayas Division sa Pilipinas VisMin Super Cup nga gikatakda karong Biyernes didto sa Alcantara Civic Center sa lungsod sa Alcantara sa habagatan-silangan sa Sugbo.
Sa labing unang duwa sa bag-ong propesyonal nga liga sa nasud nga naggikan sa habagatan nga probinsiya, ang Aquastars makigsangka batok sa Bohol Mariners.
Ang duwa gikatakda sa alas-4 sa hapon sa dili pa ang Computer Specialists makigbangga sa Siquijor Mystics sa main game sa alas-7 sa gabii.
Ang ARQ Builders/Lapu-Lapu City Heroes mopakita sa unang aksiyon sa liga sa ilang pakigbatok sa Tabogon Voyagers sa Abril 10 sa laing double-header nga naglakip sa Mystics nga moharong sa Dumaguete Warriors.
Tanang mga koponan, apil na ang ilang staff gimandoan mopaubos sa Covid-19 test ug kadto lamang magnegatibo sa resulta ang makasud sa bubble sa usa ka bulan nga torneyo ubos sa estriktong patakaran sa panglawas ug kaluwasan.
Kay ang Alcantara ubos sa liderato ni Mayor Fritz Lastimoso maoy main host, tanang apil sa liga ipahiluna sa nagkalain-laing resorts sa silingang lungsod sa Moalboal ug hatod-kuha gikan sa playing venue.
Ang mga duwa gitakda kada adlaw, apil na ang triple-headers, apan ang mga magduduwa makapahimulos og duha ka adlaw nga pahuway matag semana sa Abril 11-12, 18-19 ug 25-26.
Ang pito ka mga koponan moduwa og double round robin sa eliminasyon diin ang top two teams makaangkon og awtomatik nga luna sa semifinals ug magpaabot sa mga modaog sa knockout playoffs tali sa teams No. 3 batok No. 6 ug No. 4 batok No. 5 sa Mayo 1. Ang best-of-three' finals series gikatakda sa Mayo 6.
- Latest
