San Antonio nagmangtas, Rockets giugbok
CEBU, Philippines — Nagmangtas ang San Antonio Spurs sa hinapos nga bahin sa fourth aron pagpukan sa bisitang Houston Rockets, 103-91 sa nagpadayong duwa sa NBA kagahapon didto sa AT&T Center sa San Antonio, Texas.
Si DeMar DeRozan mipaksit og 24 puntos aron mangulo sa scoring sa Spurs, samtang sila si Jakob Poeltl ug Dejounte Murray parehong mihimo'g double-doubles sa kadaogan. Labaw ang Spurs og tres puntos paingon sa fourth period ug napahakan kini ngadto sa 85-82 sa katapusang 7:54 sa wala pa sila molusad og 10-0 run aron tapuson ang Rockets.
Si Murray adunay 18 puntos ug 10 ka rebounds, samtang si Poeltl adunay 13 puntos ug 11 ka rebounds. Sila si Keldon Johnson ug Patty Mills parehong miposa og 11 puntos alang sa Spurs.
Sila si Christian Wood ug Mason Jones maoy nangu sa Rockets nga mipugnit og 24 puntos matag usa, samtang si Ben McLemore miposte og season-high 21 puntos. Si Wood aduna sa'y game-high nga 18 ka rebounds.
Sa lain pang mga resulta, ang Memphis Grizzlies naka-eskapo bitbit ang dos puntos nga kadaogan batok sa Philadelphia 76ers, 106-104, nakaipsot sab ang Toronto Raptors batok sa Charlotte Hornets, 116-113, ang Detroit Pistons mipukan sa Miami Heat, 120-100 ug ang Portland TrailBlazers mibihag sa Atlanta Hawks sa iskor nga 112-106.
- Latest
