Gilas milubong sa Thailand
CEBU, Philippines — Batan-on man tuod ug kuwang sa kasinatian, apan hait gihapon ang Gilas Pilipinas hinungdan nga gilubong niini ang Thailand, 93-61 sa una nilang duwa sa 2021 FIBA Asia Cup qualifiers didto sa Manama, Bahrain.
Gikan sa bugnaw nga sinugdanan diin sila naglabaw og dos puntos, 21-19, ang Gilas nagmangtas pinaagi nilang Dwight Ramos ug Juan Gomez de Liano.
Tungod niini, gilampurnas sa Gilas ang Thai sa ikaduhang kuwarter, 32-10 aron pagposte og 24 puntos nga bentaha sa halftime, 53-29. Misamot pa ang kainit sa Gilas hinungdan nga miburot ang ilang labaw ngadto na sa 36 puntos, 71-35 human sa tres ni Mike Nieto sa ikatulong kuwarter.
Si Ramos wa'y sipyat sa pito niya ka itsa aron pagkadlit 20 puntos uban ang pito ka rebounds ug tulo ka assists.
Sila si Justine Baltazar ug Juan Gomez de Liano miamot og 12 puntos matag usa.
Sangkaon nila og usab ang Thailand karong Lunes, Nobiyembre 30.
- Latest
