World No.1 De los Santos naka-gold na sab

CEBU, Philippines — Nakab-ot na ni  James de los Santos ang iyang damgo nga mahimong world No.1 sa karate online.

Karon iyang gisugdan ang bag-o niyang tahas sa espesyal nga paagi.

Ang 30-anyos nga si De los Santos mipukan ni Juan Achio sa Costa Rica, 26.1-25.1 aron pagdominar sa male seniors individual event sa Katana Intercontinental League #3 niadtong Lunes.

Makasaysayanon ang maong daog alang ni De los Santos gumikan kay siya maoy labing unang player nga nakaiskor og kapin sa 26 puntos sa maong online nga torneyo.

Gumikan niini, gipahugtan  pag-ayo sa two-time Southeast Asian (SEA) Games bronze medalist ang iyang pagkupot sa numero unong puwesto sa e-kata word rankings.

Mao kadto ang ika-15 niyang sagunson nga bulawang medalya ug ika-17 sa kinatibuk-an sa 21 ka mga kompetisyon nga iyang gisalmotan sukad sa sports lockdown niadtong Marso gumikan sa pandemiya.