Abueva balik na's PBA

CEBU, Philippines — Ang notadong "The Beast" nga si Calvin Abueva makaduwa na og balik  sa PBA.

Kini human gilibkas sa PBA ang 16 ka bulan nga suspensiyon nga ilang gipahamtang sa Phoenix Super LPG star guard.

Mismo si PBA commissioner Willie Marcial ang mibuak sa maayong balita kagahapon sa buntag alang ni Abueva ug ingon man sa kampo sa Fuel Masters ubos sa pagtimon ni coach Topex Robinson nga mitratar ni Abuena nga usa ka anak.

Tayming kaayo ang pagbalik ni Abueva kay makaduwa man dayon siya karong adlawa uban sa Phoenix batok sa NLEX.

“Ni-lift ko na ang suspension ni Calvin. Resinstated na sya. Maglalaro na sya sa Monday,” dason pa ni Marcial segun sa taho sa Philstar.com.

Ang 32-anyos nga si Abueva gisilotan sa PBA og "indefinite suspension" niadtong Hunyo 2019 human sa nagsunod-sunod nga mga insidente, apil na ang panagbangi nilang kanhi TNT import Terrence Jones ug panaglalis nila sa uyab ni Ray Parks.

Apan dako na kaayo og kausaban si Abueva sukad niadto.

Gani si Abueva gipakuyog sa Phoenix gikan sa pagsugod og balik sa 2020 Philippine Cup sud sa  Clark bubble didto sa Pampanga.

Nakumpleto sab ni Abueva ang tanang rekisitos sa Games and Amusements Board (GAB) samtang anaa siya didto sud sa bubble aron makuha og balik ang iyang professional basketball license nga nakapahayag sa iyang tsansa nga makapakita balik og aksiyon sa PBA.

Karon nga gipasud na siya og balik sa PBA, si Abueva lagmit iparada ni coach Topex sa dihang sangkaon sa Fuel Masters ang Road Warriors karong alas-4 sa hapon didto sa AUF Sports Arena sa Angeles City, Pampanga.