Donaire damgo mahimong five-division world champion

CEBU, Philippines — Dili na maihap ang naangkon nga mga dungog ni Nonito 'The Filipino Flash' Donaire Jr. sa mabulukon niyang karera sa boksing nga milanat na og 19 ka tuig. Si Donaire na-world champion upat na ka higayon sa managlahing weight division. Naghari siya gikan sa flyweight, ngadto sa bantamweight, junior featherweight ug featherweight.

Sa edad nga 38-anyos ug nagpaduol na sa pagsaop sa iyang karera, si Donaire duna pay laing misyon nga gustong kab-uton.

Kini ang mamahimong usa ka five-division world champion.

Apan buot ni Donaire nga langkaton ang ikalima niyang korona sa timbang nga mas ubos kay sa iyang nahimutangan karon. Tinguha niyang maghari isip undisputed super flyweight champion.

Sa una niyang away ubos sa super flyweight, si Donaire nakadaog og interim title human gipilde ang Mehikanong si Rafael Conception, apan misaka siya sa bantamweight nga wala mahatagi og higayon nga makaaway alang sa regular world title sa maong dibisyon.

Mao na ang hinungdan nganong si Donaire gustong manaog sa timbang aron tumanon ang iyang laraw nga mamahimong usa ka five-division world champion.

Giklaro hinuon ni Donaire (40-6, 26KOs) nga nakapokus pa siya sa pagka karon sa umaabot niyang away batok sa wa'y pildeng WBC bantamweight champion nga si Nordine Oubaali (17-0, 12KOs) sa France karong Disyembre 12 didto sa Mohegan Sun Hotel and Casino sa Uncasville, Connecticut.