MDC Superb nanghawod sa 'Team Battle' chessfest
CEBU, Philippines — Ang MDC Superb Chess nga gitimon nilang National Master Merben Roque, Chris Aldritz Pondoyo ug Christopher Boco maoy kampiyon sa ikapitong leg sa Stay at Home Chess Challenge nga giulohan og 'Team Battle' niadtong weekend.
Si Roque mitali og 48 puntos, si Pondoyo miiskor og 20, samtang si Boco mikadlit og 11 alang sa kinatibuk-ang 79 puntos nga maoy naghatod kanila sa titulo ning duha ka adlaw nga pinug-anay sa utok nga giorganisar ni International Master Kim Steven Yap sa Cebu School of Chess inabagan sa Chess Infinitum, Inc.
Ang Cebuano Lakers nilang Bryle Arellano, Remegio Galenzoga ug Rosendo Yamyamin mitapos sa ikaduhang dapit uban ang 66 puntos, samtang ang Team Bachelor's nilang Richard Natividad, Redentor Nailon ug Ruel Nuttal nalandig sa ikatulong puwesto uban ang 57 puntos.
Ang Let's Relax Spa nilang NM Rommel Ganzon, Lemuel Montero ug Joseph Caballes maoy mi-okupar sa ikaupat nga puwesto uban ang 56 puntos ug gisundan kini sa Triple J Chess Stars nilang NM Jasper Rom, Jimson Bitoon ug Jan Kwan nga dunay 52 puntos.
Sa laing bahin, sila si Rey Flores, John Dave Lavandero ug Criselda Cruz maoy giila nga top senior, kiddie ug female players.
- Latest
