Luna sa playoffs laraw sa Blazers

CEBU, Philippines — Laraw sa Portland Trail Blazers nga langkaton ang ikawalo ug katapusang luna sa Western Conference playoffs sa ilang pakigsangka batok sa Memphis Grizzlies sa NBA play-in karong adlawa didto sa Walt Disney World sports complex sa Orlando, Florida.

Ubos sa pagpangu nilang Damian Lillard ug CJ McCollum, ang Blazers nakaangkon pa og laing tsansa nga makataak sa sunod nga hugna sa kompetisyon human sila nakaipsot batok sa Brooklyn Nets sa iskor nga134-133 sa kulbahinam kaayo nilang sangka niadtong Biyernes. Samtang ang Grizzlies nagpabilin sab nga buhi human gipayaka ang Dallas Mavericks.

Isip No. 8 sa West, ang Blazers dunay twice-to-beat advantage batok sa No. 9 nga Grizzlies. Kon ugaling modaog ang Memphis, mag-abot sila og usab sa Portland sa tagakay nga duwa karong Lunes.

Ang modaog sa ilang play-in maoy makigharong sa West top seed nga Los Angeles Lakers sa unang hugna sa best-of-seven NBA playoffs sugod karong Agosto 18.

Sa lain pang mga kumbati sa West playoffs, magtigi ang Los Angeles Clippers batok sa Dallas Mavericks, Denver Nuggets batok Utah Jazz ug Oklahoma City Thunder batok Houston Rockets.

Magsangka sa Eastern Conference mao ang  Miwaukee Bucks batok Orlando Magic, Toronto Raptors batok Brooklyn Nets, Boston Celtics batok Philadelphia 76ers ug Miami Heat batok Indiana Pacers.