Lakers lupig sa Thunder: Raptors, Celtics daogan mga daogan

CEBU, Philippines — Sa una nilang duwa sukad giangkon ang No. 1 seed sa Western Conference, ang Los Angeles Lakers gilubong sa Oklahoma City Thunder, 105-86 sa NBA kagahapon didto sa Orlando, Florida.

Mao kadto ang labing unang duwa sa Lakers ning season diin sila wala makatilaw og labaw.

Si Chris Paul mitali og 21 puntos, samtang si Danilo Gallinari mitampo og 19 puntos alang sa Thunder nga alkansi lamang og usa ka duwa sa Utah Jazz alang sa ikaupat nga dapit sa Western Conference bitbit ang 42-25 record.  Nangu sa pilderong Lakers mao si LeBron James uban ang 19 puntos ug 11 ka rebounds, samtang si Anthony Davis mikandos lamang og otso puntos, walo ka rebounds ug lima ka assists.

Sa laing aksiyon, si Fred VanVleet mikadlit og 21 puntos ug 10 ka assists aron pangulohan ang  defending  champion Toronto Raptors nga misumpo sa Orlando Magic sa iskor nga 109-99.

Ang Magic natagak ngadto sa 32-37, apan nagpabilin sa ikawalong puwesto sunod sa  Brooklyn Nets nga gikastigo sa Boston Celtics sa iskor nga 149-115.

Si Jaylen Brown  maoy bida sa Celtics uban ang 21 puntos. Si Jason Tatum miamot og 19 puntos alang sa Boston nga mitali sa labing dako nilang iskor bisan og wala  paduwaa ang ilang star guard nga si Kemba Walker.

Sa laing bahin, si Cameroonian star Joel Embiid mipabuto og 30 puntos ug 11 ka rebounds aron agakon ang Philadelphia 76ers ngadto sa 107-98 nga daog batok sa Washington Wizards.

Apan wala kaayo magmaya ang Sixers gumikan kay ang bitoon nilang point guard  nga si Ben Simmons nakahiagum og angol sa  wala niining tuhod sa ikatulong kuwarter.

Ang Sixers ikaunom karon sa Eastern Conference uban ang 41-27 record, samtang ang Wizards nga nagkupot og 24-44 nga marka, hingpit nga matagak kon ugaling makatilaw pa kini og laing pilde.

Sa uban pang mga resulta,  si Joe Ingles dunay 25 puntos ug sila si Mike Conley ug Rudy Gobert nagkumboya'g 44 puntos sa dihang gipakaging sa Utah Jazz ang Memphis Grizzlies, 124-115, samtang si Michael Porter mipupo og 30 puntos ug 15 ka rebounds ug si Nikola Jokic mikamada og 25 puntos ug 11 ka assists alang sa Denver Nuggets nga mipayaka sa  San Antonio Spurs, 132-126.