Vanvleet, Porter milansang career-high

CEBU, Philippines — Si Fred VanVleet mikadlit og career-high 36 puntos sa dihang gipilde sa Toronto Raptors ang Miami Heat sa iskor nga 107-103 sa NBA kagahapon didto sa Orlando, Florida.

Mangtas kaayo si VanVleet nga miposa og pito ka tres alang sa Raptors nga nagpabilin sa ikaduhang dapit sa Eastern Conference bitbit ang 48-18 record.

Miabag ni VanVleet sa opensiba mao si Pascal Siakam nga dunay 22 puntos.

Si Kyle Lowry mitali og 14 puntos samtang si Serge Ibaka miamot og 15 puntos alang sa defending NBA champion.

Nangu sa pilderong Miami mao si Goran Dragic ng adunay 25 puntos.

Sa laing duwa, si Nikola Jokic mikadlit og triple-double sa dihang gipukan sa Denver Nuggets ang Oklahoma City Thunder sud sa overtime sa iskor nga 121-113.

Si Jokic mitapos uban ang 30 puntos, 12 ka rebounds ug 10 ka assists alang sa Nuggets nga naglukdo na karon og 44-23 nga baraha. Ikatulo sila sa Western Conference  sunod sa Los Angeles Lakers ug Los Angeles Clippers.

Dako sab og natampo sa Nuggets si Michael Porter nga mipabuto og career-high 37 puntos.

Wala sab magpabitin ang Indiana Pacers nga mibuntog sa Washington Wizards sa iskor nga 111-100, salamat sa 34 puntos ni TJ Warren.