Rockets mitiklo sa Bucks: Westbrook, Harden nangu sa kadaogan

CEBU, Philippines — Si Russell Westbrook mikadlit og 31 puntos ug si James Harden miamot og 24 puntos aron pangulohan ang Houston Rockets nga mitiklo sa Milwaukee Bucks sa iskor nga 120-116 bisan pa man sa eksplosibong duwa ni Giannis Antetokounmpo.

Naglabaw pa unta ang Bucks, 112-104 human sa tres ni Khris Middleton sa nahibiling 3:14 sa duwa, apan gitak-op sa Rockets ang duwa pinaagi sa nagkayong 16-4 run aron patikalbungon ang Bucks.

Init sab kaayo ang tirada sa Rockets nga mibomba sa Bucks og 21 ka 3-pointers, upat niini gikan kang Daniel House.

Nahagba ang Bucks bisan og si Antetokounmpo mipabuhagay og 36 puntos, 18 ka rebounds ug walo ka assists. Si Middleton midugang og 27 puntos ug 12 ka rebounds, samtang si Brook Lopez dunay 23 puntos ug 12 ka rebounds sa pilderong kawsa.

Sa laing duwa, si Jayson Tatum mikadlit og 34 puntos ug si Jaylen Brown miamot og 30 puntos sa dihang gipakaging sa Boston Celtics ang Portland Trail Blazers, 128-124.

Mitampo si Gordon Hayward og 22 puntos,  apan ang krusyal nga duha ka free throws sa nahabiling tres segundos  maoy nagtuldok sa daog sa Celtics.

Si Damian Lillard mikamada og 30 puntos ug 16 ka assists, samtang si Jusuf Nurkic dunay 30 puntos ug siyam ka rebounds apan nakawang iyang paningkamot sa Trail Blazers.

Wala sab magpaalkansi si DeMar DeRozan nga mibahog og 21 puntos ug 10 ka rebounds sa dihang gibihag sa San Antonio Spurs ang Memphis Grizzlies sa iskor nga108-106.

Ang kaparotan sa Grizzlies nagseguro sa Dallas Mavericks og luna sa playoffs.