2021 Vietnam SEA Games arnis, triathlon, skateboard walay labot

CEBU, Philippines — Dunay dili maayong balita alang sa mga Pinoy arnisadors, triathletes ug skateboarders.

Ang arnis, triahtlon ug skateboard walay labot sa mga events nga kumbatihan sa 31st Southeast Asian (SEA) Games didto sa Hanoi, Vietnam sunod tuig.

Nasayran kini sa miaging adlaw human si Philippine Olympic Committee (POC) President Abraham 'Bambol' Tolentino nakadawat og suwat gikan sa host Hanoi diin gibutyag ang gidaghanon sa mga sports nga banatan sa torneyo nga mahitabo kausa lamang sud sa duha ka tuig.

Wala sa'y labot ang obstacle course, jiujitsu, e-sports, sailing, soft tennis, surfing, sambo, wakeboarding, windsurfing, modern pentathlon, baseball, duathlon, rugby, softball ug squash.

Kining mga sports nakatampo og 58 sa makasaysayanong 149 ka golds nga maoy nagtuboy sa Pilipinas aron langkaton ang overall championship sa 30th SEA Games nga gi-host niini sa miaging tuig.

Kon magpabilin ang listahan, dako kining suntok batok sa kampanya sa Pilipinas nga mosakmit og back-to-back overall championship sa SEA Games.

Seguradong kumbatihan didto sa Hanoi mao ang archery, badminton, 3x3 ug 5x5 basketball, billiards ug snooker, boxing, canoe-kayak, chess, cycling, dancesport, fencing, football ug futsal, golf, gymnastics, aerobic, handball, judo, karate, muay, pencak silat, petanque, rowing,sepak takraw, shooting, table tennis, taekwondo, tennis, indoor ug beach volleyball, weightlifting, wrestling, wushu, fin swimming, bodybuilding, kurash, kickboxing ug vovinam.