Negosasyon sa mga kontrata mokisaw na

CEBU, Philippines — Kay hapit na magsugod og balik ang opisyal nga praktis sa mga PBA, gipaabot nga mokisaw na sab ang negosasyon sa mga teams uban sa ilang players, kansang kontrata nangapupos na o mapupos pa.

Tataw nga mao kini ang senaryo nga mahitabo human gipahinumduman ni PBA commissioner Willie Marcial ang 12 ka teams nga kinahanglan makapirma usa og kontrata ang ilang players, kansang kontrata natapos na o talihuman pa sa dili pa sila mobalik sa training.

Dunay mga players, kansang kontrata napupos na niadtong Mayo ug Hunyo.

Si Marcial nagkanayon nga segun sa lagda sa liga, ang teams tagaan og lima ka adlaw gikan sa pagsugod og balik sa training aron papirmahon og lab-as nga kontrata ang ilang players.

"Ang mahalaga, pag start natin, pagpalagay mo ng July 22, kailangan umandar na kasi yung kontrata, kailangan mag-renew ka ng contract ng players within five days," matud pa ni Marcial.

Sila si Arwind Santos ug Alex Cabagnot sa San Miguel Beermen maoy nangu sa bigatin nga mga pangan nga makignegosasyon sa ilang kontrata nga ma-expire karong Agosto 31.

Sa laing bahin, si Marcial gikatakda nga makigtagbo sa mga coaches ug team managers karong Biyernes aron ipadangat ang mga patakaran sa liga kabahin sa panglawas ug kaluwasan nunot sa hinay-hinay nilang pagbalik sa training nga aprubado sa Inter-Agency Task Force (IATF).