NBA tapuson ang season karong oktubre

CEBU, Philippines — Nagtinguha ang National Basketball Association (NBA) nga humanon ang nahunong niining 2020 season sa tunga-tungan bahin sa Oktubre.

Matud pa sa ESPN nga kabahin kini sa iskedyul nga giplastada ni league commissioner Adam Silver nga nagplanong ibalik ang aksiyon sa liga karong Hulyo 31.

Kining tanan gikatakda nga aprubahan sa NBA Board of Governor's sa ilang tigum karong Huwebes (ugmang adlawa oras dinhi sa Pilipinas). Segun sa buot mahitabo ni Silver, kon maabot man gani og Game-7 ang NBA Finals duwaon kini sa petsa nga dili molapas sa Oktubre 12.

Gitaho sa ESPN nga ang tanang mga plano ni Silver suportado sa  kadagkoan sa liga ilabi na sa mga team owners.

Sa pagka karon, ang NBA ug ang NBA Players Association nagpinalisar pa sa mga detalye kabahin sa pagtiwas sa season nga nahunong niadtong Marso 11 gumikan sa Covid-19 pandemic. Apil sa ilang pagasabotan ang format sa kompetisyon nga maoy modeterminar kon kinsa'y moabante sa 16-team playoffs. Sa pagbalik unya sa liga, ang tanang mga duwa adto ipahigayon sa Disney's ESPN Wide World of Sports Complex sa Orlando ,Florida.