GM So nanghawod sa online chess tourney

CEBU, Philippines — Nagpadayon ang pagsidlak ni Fil-Am chess Grandmaster Wesley So taliwala ning kalibutanhong pandemya. 

Sa labing unang Clutch Chess Champions Showdown nga online chess tournament, gipakuratan ni So si world No. 2 Fabiano Caruana aron sakmiton ang korona.

Gibulsa ni So ang $30,000 (P1.5 million) nga ganti human midaog sa ika-10 ug ika-11 sa 12 ka duwa nilang finals ni Caruana. Nagtabla unta sila sa tiebreak, 9-9, apan ang 26-anyos nga si So maoy gideklarar nga kampiyon gumikan sa mas daghan niining "clutch games".

Ang labing uwahing kalampusan ni So naabot unom ka bulan sukad iyang gidominar ang World Fischer Random Chess event.