Allowance sa National Athletes laslasan
CEBU, Philippines — Gilantaw karon sa Philippine Sports Commission (PSC) ang posibilidad nga laslasan ang binulan nga allowance sa mga national athletes ug coaches.
Kini human ang Philippine Amusement and Games Corporation (PAGCOR) mitunol lamang og P9 million sa ahensiya alang sa bulan sa Abril.
Dako kaayo kining kaltas sa P120 million nga gidawat sa PSC gikan sa PAGCOR sa miagi segun sa mando sa balaod.
Gumikan niini, dako'g puruhan nga maapektuhan gyud ang allowance sa mga nasudnong atleta ug ilang mga coaches gumikan kay ang PAGCOR mao may nag-unang tinubdan sa pundo sa PSC.
Bisan pa niini, duna hinuo'y maayong balita nga miaabot sa mga national athletes ning panahon sa pandemya.
Kini gumikan kay silang tanan makadawat og 20 porsiyento nga diskwento sa mga palaliton sama sa pagkaon, medisina, transportasyon ug bisan na gani sa mga restaurants, hotels ug movie theaters.
- Latest
