Tabal, Didal gihangop pagsibog sa Olympics

CEBU, Philippines — Ang mga Sugboanong atleta nga sila si Mary Joy Tabal ug Margielyn Didal parehong nagtinguha nga makasalmot sa 2020 Tokyo Olympics, apan ilang gihangop ang pagka-suspenso niini sud sa usa ka tuig.

Ang prestihiyosong torneyo nga mahitabo kausa lamang sud sa upat ka tuig gikatakda unta karong Hulyo 24 ngadto sa Agosto 9, apan ang International Olympic Committee (IOC) miuyon sa awhag sa Tokyo Olympics organizing committee nga i-uswag ang mga duwa ngadto sa 2021 gumikan sa coronavirus pandemic.

Si Tabal nga naglaraw unta sa ikaduha niyang Olympics human mihimo og kasaysayan isip labing unang Pinay Olympic marathoner sa 2016 Rio Games didto sa Brazil, nagkanayon nga iyang gikalipay kining maong kalamboan gumikan kay alang man kini sa kaayohan ug kaluwasan sa tanan.

"I'm glad that we will be able to have the Olympics at a time where it is surrounded by excitement and celebration rather than stress and anxiety. The safety of the people in the world will always be most important," matud pa ni Tabal.

"I'm happier that at least it's only postponed, not cancelled," dugang pa niya. "Right now, we should all be more concerned about the health of our world than excellence in sports."

Sa iyang bahin, si Didal nagkanayon nga andam siya bisan og kanus-a ipahigayon ang Olympics.

"Maski unsa. Kung madayon o dili this year o next year, padayon lang ko gihapon sa akong prepasyon sa Olympics," matud pa ni Didal nga mitunol sa labing unang gold medal sa Pilipinas sa skateboarding event sa Asian Games duha na ka tuig  ang milabay didto sa Indonesia.

Si Ramon Solis, ang coach nilang Cebuano weightlifters John Febuar Ceniza ug Elreen Ann Ando nga gisaytan sab ang Olympics, miuyon sab sa lakang sa IOC.

"Mas mayo nga ma-postpone kay karong panahuna, wala gyud nay kondisyon tarong ang mga athletes apil na silang Ceniza ug Ando ana. Mas maayo nga next year na para naa pay time maka-preparar,"  sumala  pa ni Solis nga sab ka Olympian.