Cavaliers miparot sa Sixers

CEBU, Philippines – Ang Cleveland Cavaliers miposte sa ikaupat nilang daog sud sa lima ka duwa human gibihag ang Philadelphia 76ers, 108-94 sa NBA kagahapon didto sa Quicken Loans Arena didto sa Cleveland, Ohio.

Si Collin Sexton mihipos og 28 puntos, si Larry Nance dunay 13 puntos ug 15 ka rebounds, samtang si Tristan Thompson mitali og 14 puntos alang sa miratsada nga Cavaliers.

Nakapabor hinuon ang Cavs gumikan kay wala makatiwas og duwa ang alas sa Sixers nga si Joel Embiid kay nakaangkon og injury sa unang kuwarter pa lamang sa aksiyon.

Na-injured ang walang abaga ni Embiid human sila magbangga sa sentro sa Cavs nga si Ante Zizic sa nahibilin nga 49 segundos sa unang kuwarter.

Mibalik si Embiid kadiyot sa ilang bench sa ikaduhang kuwarter, apan mibiya sa hingpit atol sa halftime. Gikatakda siya nga eksaminon sa ilang mga doktor karong adlawa aron pagsuta kon unsa ka-grabe ang nahiaguman niyang injury.

Gawas ni Embiid, wala sab ang  sinaligang guwardiya sa Sixers nga si Ben Simmons kay dunay problema sa ugat sa ubos nga bahin sa iyang likod.

Si Shake Milton dunay 20 puntos, samtang si Furkan Korkmaz mitali og 14 puntos sa Sixers nga napilde sa ikapitong sunod-sunod nga higayon sa ilang road games.

Sa uban pang mga duwa, si Bradley Beal mipabuto og 30 puntos aron agakon ang Washington Wizards ngadto sa 110-106 nga kadaogan batok sa Brooklyn Nets, samtang sila  si Russell  Westbrook ug James Harden nagkumbinar og 63 puntos sa Houston Rockets nga milubong sa  Memphis Grizzlies sa iskor nga 140-112 alang sa ikalima nilang sunod-sunod nga daog.