99ers abante sa ABL quarterfinals

CEBU, Philippines – Si GV Dumadag mipabuto og 25 puntos  dihang gipakaging sa 99ers ang Jamal's Lechon, 81-69 sa 1st Amicis Basketball League (ABL) season didto sa Consolacion Sports Complex.

Miamot si Emiric Abellar og 23 puntos, samtang si Manuel Cobcoban mitali og 17 puntos alang sa 99ers ni playing coach Cyrus Pono nga segurado nang sud sa quarterfinals sa 30-above category bitbit ang 4-3 win-loss record.

Kontrolado sa 99ers ang duwa gikan sa pagsugod ug wala na sila molingi pa sukad mirehistro og 31-24 nga bentaha sa halftime. Misamot pa ang ilang kainit aron palapdan ang ilang labaw ngadto sa 13 puntos, 61-38 nga ilang namintinar hangtod pagkahuman sa aksiyon.

Si Jude Pinto maoy nangu sa Jamal's Lechon uban ang 36 puntos, 12 ka rebounds. Si Ian Piti-ilan dunay 13 puntos, samtang si Jimbe Saberon mihipos og 11 puntos  sa pilderong kawsa.

Ang mga duwa sa labing unang ABL season nga gipaluyohan sa North Sports Apparel, VDrink Malunggay Juice, Fighter 50 Wine ug Consolacion LGU ubos sa liderato ni mayor Joyjoy Alegado ubos sa superbisyon ni commissioner Lee Mar Dahil inabagan ni technical committee chief  Aurelio Eslawan.