UV Lancers naghari sa Uy Masuy Cup

CEBU, Philippines —  Ang University of the Visayas (UV) Green Lancers nakaipsot  batok sa University of Cebu (UC) Webmasters, 106-105 aron langkaton ang kampiyonato sa 1st Uy Masuy Cup Invitational Basketball Tournament niadtong Domingo diha sa Cebu City Sports Institute gym.

Si Lass Coulibaly maoy nangu sa upat ka UV players nga mipatik og double figures uban ang game-high 34 puntos.

Miamot si Jiesel Tarrosa og 19 puntos, si Froilan Maglasang mi-iskor og 17, samtang si Melvin Butohan mikamada og 14 puntos alang sa Lancers nga   nakamaniho pag-eskapo ngadto sa kulbahinam nga kalampusan.

Abante lamang og tres puntos sa halftime, 50-47, ang Lancers ni coach Gary Cortes milusad og   31-19 nga rally sa ikatulong kuwarter aron paburuton ang ilang labaw ngadto sa 15 puntos, 81-66 sa katapusang 10 minutos sa aksiyon.

Apan ang Webmasters nga ubos na karon sa pagtimon ni coach Kennetth Kernn Sesante,   miresbak hinungdan nga nakasikit kini ngadto sa usa na lang ka lugas sa himalatyong segundos sa duwa.

Duna pa unta'y tsansa ang Webmasters nga kawaton ang daog, apan wala nada ang tira ni Isaiah Blanco dayong kapupos sa oras.

Giangkon sa Lancers ang korona nga wa'y pilde sa tulo ka duwa. Ilang gibuntog ang Southwestern University (SWU)-Phinma Cobras ug IPL Geckos sa New York sa nag-una nilang duha ka duwa.

Si Rodel Gravera maoy nangu sa pilderong UC uban ang 22 puntos.