Gullas Cup: Vision 2020 caging mosikad na

CEBU, Philippines — Ang sumusulbong nga mga atleta sa natad sa basketbol ug ingon man kadtong mga talento nga naghuwat masigpatan gikan sa unang distrito sa Sugbo makahigayon na sab pagbaid sa ilang abilidad pinaagi sa Gullas Cup: Vision 2020 Under 21 Basketball Tournament nga mosikad karon didto sa Talisay City Sports Complex.

Atol sa usa ka press conference kagahapon, si Cebu First District Rep. Eduardo 'Eddiegul' R. Gullas, ang utok ning labing taas nga developmental basketball program sa probinsiya, magpasigarbuhon kay nakab-ot ug nasustinir sa Gullas Cup ang misyon niini sud sa lima na ka dekada.

Sukad sa pagkahimugso niini niadtong 1970 diin ang Minglanilla maoy unang kampiyon, ang Gullas Cup nakahulma og pipila ka mga banggiitang basketbolista sa nasud apil na sila si PBA stars Roger Pogoy ug Brian Heruela. 

Sa milabay'ng mga katuigan, nakatabang sab sila og daghang mga atleta aron maapil sa varsity teams sa nagkadaiyang mga tunghaan dinhi sa Sugbo ug sa kaulohan.

Sa dili pa ang mga duwa, usa ka simpleng seremonyas sa pagbukas ang ipahigayon sa alas-2 sa hapon nga pagatambongan ni Gullas ug sa iyang apo nga si Talisay City Mayor Samsam Gullas. 

Ang mga partisipanteng koponan  mao ang defending champion Talisay  City Aquastars Minglanilla Archangels, Naga Electrifiers,  Carcar City Lechoneros, Sibonga Pillars ug San Fernando Spartans.