NBA debut ni zion mahitabo karon batok Spurs

CEBU, Philippines – Ang giatngan nga NBA debut ni New Orleans star rookie Zion Williamson mahitabo na karong adlawa sa dihang sangkaon sa Pelicans ang San Antonio Spurs.

Matud pa sa No. 1 overall pick sa 2019 Draft nga dili sayon nga dalan ang iyang agian sa iyang pagbalik sa korte, apan iyang gipaneguro nga ning puntoha andam na kaayo siya nga mopakita'g aksiyon.

"The rehab workouts are long and strenuous," matud pa ni Williamson. "There were a lot of times where I wanted to punch a wall or kick a chair. It's frustrating to not be able to move your body the way you want to, especially since I'm 19. It's been tough, but I battled through."

Nalangan ang NBA debut ni Williamson og pipila ka bulan kay na-injured siya adtong pre-season ug dayon gioperahan ang tuo niyang tuhod niadtong Oktubre 21 sa miaging tuig.

Human sa makuting rehabilitasyon nga milanat og dul-an tulo ka bulan, nagpanikad na si Williamson nga mopakitang gilas sa liga sa labing unang higayon sa regular season.

"I know the people of New Orleans are going to show a lot of love because that's what they do," sumala pa ni Williamson. "For the outside people, all I can do is invite the love. If they want to bring it, then bring it."

Giklaro hinuon ni Pelicans coach Alvin Gentry nga limitado una nga mga minuto ang iyang ihatag ni Williamson aron dili kini makalitan ug ang iyang desisyon mag-agad kon unsay ikapakita sa alas niyang rookie sud sa korte.