Spurs mibaraw sa Heat

CEBU, Philippines — Sila si LaMarcus Aldridge, DeMar Derozan ug Patty Mills mikawat og atensiyon sa dihang gipaluhod sa San Antonio Spurs ang Eastern Conference contenders Miami Heat, 107-102 sa NBA kagahapon didto sa AT&T Center sa San Antonio, Texas.

Ang sentrong si Aldridge mikadlit og 21 puntos, samtang si DeMar  DeRozan  miiskor og  20  puntos  uban  ang  siyam ka rebounds  ug  siyam sab ka  assists.

Wala sab magpa-alkansi si Mills nga mipupo og 14 sa iyang 18 puntos sa first half nga nakatabang pagbangon sa Spurs human mabiyai og 10 puntos.

Si Mills milangkat sab og lima ka rebounds alang sa Spurs nga mitumba sa No. 2 team sa Eastern Conference.

Nadoble ang selebrasyon ni Mills gumikan kay sa ikaduhang kuwarter iya man nga gilansang ang ika-1,000 nga 3-pointer sa iyang karera.

Sa kasamtangan hinuon, ang Spurs nalansang sa ikasiyam nga puwesto sa Western Conference bitbit ang 18-23 record.

Si Bam Adebayo mipupo og 21 puntos ug 16 ka rebounds alang sa Heat nga natagak ngadto sa 29-13. Walo na ka duwa ang ilang biya sa nagharing Milwaukee Bucks.