Almazan misaad nga mamawi

CEBU, Philippines — Giangkon ni PBA All-Star Raymond Almazan nga grabe siya nga nasakitan human siya wala katiwas sa PBA Govs Cup finals ug wala siya katabang sa Meralco Bolts nga napilde sa Barangay Ginebra Kings.

Si Almazan nakahiagum og seryosong injury sa tuhod sa Game 3 sa serye ug mao kini iyang nakita nga rason og nganung galisud ang Meralco sa pagdepensa sa mga bigmen sa Ginebra labi na sa gibayaw nga finals MVP nga si Japeth Aguilar.

"Masakit talaga na di ako makatulong sa team ko,"matud ni Almazan sa Spin.ph.

Ang 6-foot-8 nga si Almazan mi-average unta og 17.5 points, 11 rebounds ug 1.5 blocks sa sayong bahin sa serye, apan demalas tungod kay wala na siya katampo pa og dako sa Bolts.

Misaad hinuon si Almazan nga mamawi. Mupaubos siya og operasyon aron hingpit nga maalim iyang tuhod ug human sa iyang recovery, gusto niya nga mubalik dayon og duwa.

"I'll come back stronger na lang. Nangyari na eh, wala tayong pwedeng sisihin. Di ko na maibabalik yun. Di ko na maire-rewind. Fast forward na lang," dugang ni Almazan.