Rascals kampiyon sa GJA-Doggy Cup Season 3
CEBU, Philippines — Sayong pinaskohan ang naangkon sa Rascals dihang ilang nabira ang korona sa GJA-Doggy Cup Basketball Season 3 human gipilde ang Rongcales/HOV Customs Brokerage, 89-81 niadtong Martes diha sa CPA gym sa north reclamation area.
Nagkumboya'g 29 puntos sila si Niki Pimentel ug Takloy Moral aron mangu sa scoring sa Rascals nilang playing team managers Boodee Monteño ug Resty Lope.
Si Pimentel miariya og 15 puntos, samtang ang MVP nga si Moral mihakot og 14 puntos sa Rascals nga malipayong miuli bitbit ang championship trophy.
Upat unta ka players sa Rongcales/HOV ang mitala og double figures pinangulohan ni Rivera nga mikabkab og 23 puntos, apan nakawang lang ang ilang mga paningkamot kay wala sila makalahutay sa nahibiling mga gutlo sa duwa.
Si Jim Villa miamot og 18 puntos, samtang sila si Daculan ug Francis Palero nagkumboya'g 24 puntos sa team nilang Richard Rongcales ug Christian Villacastin.
Sa gubat alang sa ikatulong dapit, ang Cutarra Customs Brokerage mibuntog sa Thor Customs Brokerage sa ligas sab kaayo nila nga duwa, 85-82.
Nagmangtas og maayo si Dondon Ecojedo ug mirehistro kini og season-high 40 puntos aron pangulohan ang Cutarra ni playing team owner Rocel Cutarra.
Nakatampo sab og dako sa kadaogan si Matias nga miamot og 14 puntos, ingon man silang Lloyd Rondobio ug Lemuel Jarapan nga mitampo'g 13 ug 10 puntos matag usa.
Ang Thor Customs Brokerage ni Eric Lima gipangulohan sab ni Jopel Paca nga mipatuasik og 25 puntos, gisundan ni Don Yncierto nga mipabuhagay og 21 puntos. Si Ronald Dungog nalimitahan lang ngadto sa 13 puntos.
Ang liga nga giorganisar ni Ronor Alinsug sa abag nilang commissioners Mark Gornez, Noel Medalle ug Arden Earl Valenzuela, nagmalampuson tungod sa pagtinabangay sa tanang mga miyembro ug sa suporta sa tanang team managers nga silang Resty Lope, Richard Rongcales ug Christian Villacastin, Rocel Cutarra, Eric Lima, Eulo Arevalo ug MJ Engracial.
PUNTOS MATAG USA
Unang duwa:
CUTARRA (85) – Ecojedo 40, Matias 14, Rondobio 13, Jarapan 10, Cutarra 4.
THOR (82) – Paca 25, Yncierto 21, Dungog 13, Aguilon 9, Pacaña 6.
Ikaduhang duwa:
RASCALS (89) – Pimentel 15, Moral 14, Monteño 8, Intes 6, Avenido 6, Cartagena 6, Remonde 6, Delima 6, Lleve 5, Mabangue 3, Diaz 2, Regis 2.
RONGCALES/HOV (81) – Rivera 23, Villa 18, Daculan 13, Palero 11, B. Medalle 3, Intero 2, Dayon 2.
- Latest
