99ers, 1985 Legends miduol sa kampiyonato

CEBU, Philippines – Ang Team 99ers ug ang 1985 Legends mipaduol og usa ka tikang ngadto sa paglangkat og back-to-back titles human sila maoy naka-una sa tagsa-tagsa nila ka best-of-three division finals sa University of San Carlos-North Alumni Basketball Conference (USC-NABC) Cebu City Mayor’s Cup diha sa USC-North Campus gym.

Nagsandig sa triple-double ni Lou Regidor, ang Legends nakapanimaho na sa korona sa seniors division human ilang gilampaso ang 1998 Barako, 69-54, samtang ang 99ers nagpanikad na sab nga makasagunson og duha ka kampiyonato human sila nakaipsot batok sa 1998 Sipat, 80-76, sa pasiunang duwa sa Division 1 finals.

Si Regidor maoy bida sa Legends uban ang 21 puntos, 10 ka rebounds ug 10 ka assists samtang si Fritz Villamor maoy nangu sa 99ers human mitagak og 31 puntos nga iyang gipalamanan og 12 ka rebounds. Sa laing bahin, ang 2002B Goats ug 2015 Samurais nagdanga-danga na sab ngadto sa pagdimdim sa katam-is sa kampiyonato.

Ang Goats mibugha sa Dos Mil Uno Shipmen, 70-59, aron pagposte og 1-0  nga bintaha sa Division 2 finals, samtang ang Samurais mitagud sa 2013 District, 84-59, aron paglayat ngadto sa usa na lang ka daog aron birahon na ang titulo sa Division 3. Si Joel Dinawanao maoy migiya sa Goats bitbit ang 10 puntos, walo ka rebounds ug usa ka assist samtang si Dejoe Taytayan maoy bayani sa Samurais sa pagyagyag niini og 22 puntos, pito ka rebounds, lima ka assists ug tulo ka steals.