Tinagsip sa NBA

Curry Marso pa kabalik

CEBU, Philippines – Ang alas sa Golden State Warriors nga si Stephen Curry nagkanayon nga makabalik pa siya og duwa sa dili pa matapos ang season apan kini mahitabo unya pa sa naghinapos nga bahin sa Marso sunod tuig.

Duha ka semana ang milabay, nabali ang walang kamot sa two-time MVP human nagbangga sila sa sentro sa Phoenix Suns nga si Aaron Bynes samtang siya mi-layup sa bola. Mao kini ang labing seryosong injury nga nahiaguman ni Curry sa iyang karera.

Hayward papahuwayon

Si Boston Celtics forward Gordon Hayward dili makapakitag aksiyon sud sa mosunod nga unom ka semana human ma-operahi ang nabuak niining walang kamot kagahapon didto sa New York. Nayayay si Hayward atol sa 135-115 nga kadaogan sa Celtics batok sa San Antonio Spurs niadtong Domingo.

Sa kinatibuk-an, si Gordon makapalta og 19 ka duwa. Puyde na siyang mobalik sa ilang sangka batok sa Toronto Raptors unya sa adlaw sa Pasko.

Bucks shooter na-injured sab

Lain pang All-Star nga nayayay mao si Kris Middleton sa Milwaukee Bucks. Nabun-og ang walang hita ni Middleton niadtong Lunes diin gipukan sa Bucks ang Oklahoma City Thunder, 121-119.

Dili hinoon kuyaw ang injury nga nadangatan ni Middleton apan kinahanglan una niya nga mopahuway   hangtud sa tulo ka semana.