UC juniors nakaipsot sa CIT-U
CEBU, Philippines — Ang University of Cebu (UC) Baby Webmasters nakasugakod sa malisud nga hagit sa Cebu Institute of Technology-University (CIT-U) tibuok duwa aron pag-eskapo niini ngadto sa kulbahinam nga daog batok sa Baby Wildcats, 65-60 sa 19th Cebu Schools Athletic Foundation, Inc. (CESAFI) kagahapon sa Cebu Coliseum.
Sukwahi sa dominante nilang salida batok sa University of the Visayas (UV) Baby Lancers ug University of San Carlos (USC) Baby Warriors diin sila miposte og average winning margin nga 32.0 puntos, ang UC bantams gipangingot og bogbog batok sa Baby Wildcats nga mikumbati og maayo gikan sa sinungdan hangtod sa katapusan nga bahin.
Kay naangklahan ang ilang star players nga sila si Isaiah Blanco ug Maczi Micutuan, ang Baby Webmasters ni coach Brad Samonte mikayod usa og maayo sa naghinapos nga bahin sa mainit nga aksiyon sa wala pa pahugti ang ilang pagkupot sa liderato sa juniors division bitbit ang 3-0 record.
Si Blanco, anak ni kanhi PBA star Dondon Hontiveros nga karon usa na ka konsehal sa dakbayan sa Sugbo, nalimitahan ngadto lamang sa singko puntos, samtang si Micutuan miiskor lamang og nuybe, apan maayo na lang kay si Daniel Lapiz miabaga sa ilang opensa aron pangulohan ang UC uban ang 16 puntos.
Labaw lamang og dos puntos sa halftime, 29-31, ang Baby Webmasters manusginhawang nakigbugno sa Baby Wildcats sa nahibilin nga bahin sa duwa.
Katapusan hinuong nakasikit ang CIT-U sa iskor nga 58-62 sa tres ni Romulo Genandoy Jr. gumikan kay si Kenvon Pondoc mitubag sab dayon pinaagi sa pagposa og buzzer-beating 3-pointer nga nakapaginhawa og lawom sa Baby Webmasters, 65-58, sa nahibilin nga 33 segundos sa duwa.
- Latest
