Cone hayan maoy Coach sa Gilas
CEBU, Philippines — Hayan nga si multi-titled PBA coach Tim Cone maoy sunod nga coach sa Gilas Pilipinas alang sa Southeast Asian Games sa Nobiyembre.
Si Cone nga maoy nagkupot sa rekord sa labing daghan nga PBA titles sa iyang 21 ka tropeyo, gipaabot nga makigtigum sa Samahang Basketball ng Pilipinas (SBP) aron hisgutan ang posibleng pagdala niya sa national team nga modepensa sa ilang trono sa SEAG.
Nasayran nga sila si SBP chairman emeritus Manny V. Pangilinan ug president Al Panlilio milihok dayon aron makakita og coach sa Gilas alang sa SEA Games human sa paghawa ni Yeng Guiao isip coach.
Kon mahinayon, kini ang ikaduhang higayon nga mo-coach si Cone sa national team nga una niyang gidala niadtong tuig 1998 diin nasakmit nila ang bronze medal sa Asian Games.
Ang mga magduduwa ni Cone niadtong tungora mao sila si PBA legends Alvin Patrimonio, Johnny Abarrientos, Vergel Meneses ug Allan Caidic.
Gikataho nga lakip sa line-up sa Gilas sila si Christian Standhardinger ug Stanley Pringle uban sa mga amateurs nga sila si Ricci Rivero, Kiefer Ravena, Kobe Paras ug 7-footer Kai Sotto.
- Latest
