Spurs moretiro No. 9 jersey ni Parker

CEBU, Philippines — Gipahibalo sa San Antonio Spurs kagahapon  nga pormal nilang iretiro ang No. 9 ni Tony Parker unya sa Nobiyembre  11 sa dihang mo-host sila sa Memphis Grizzlies sa usa ka NBA regular-season game.

Si Parker maoy ika-10 nga player sa kasaysayan sa prangkisa sa Spurs kansang numero iretiro sunod nilang Bruce Bowen (12), Tim Duncan (21), Sean Elliott (32), George Gervin (44), Manu Ginobili (20), Avery Johnson (6), Johnny Moore (00), David Robinson (50) ug James Silas (13). 

Ang garbo sa France nakaduwa og 17 sa 18 ka tuig niya sa NBA uban sa San Antonio. Sa maong panahon, iyang gitabangan ang Spurs nga makasakmit og upat ka kampiyonato.

Niadtong 2007, si Parker maoy gibayaw nga Finals MVP aron mahimong labing unang player gikan sa Europe nga nakaangkon sa maong talagsaong dungog.

Gibira sa Spurs isip maoy ilang 28th overall pick sa 2001 NBA Draft, si Parker maoy lider sa Spurs sa assists (6,829), ikaupat sa pinuntosay (18,943) ug steals (1,032), ikalima sa labing daghan nga free throws nga nasud (3,309) ug ikaunom sa rebounds (3,313).

Sa kinatibuk-an, si Parker nakasilbe og 1,254 ka duwa sa mabulukon niyang karera nga milanat og 18 ka season diin siya mi-average og 15.5 points, 5.6 assists ug 2.7 rebounds.

Si Parker mipahibalo sa iyang pagretiro sa NBA niadtong Hunyo human siya nakaduwa og usa ka season uban sa Charlotte Hornets.