10th Mayor Alegado Cup buksan karong September 1

CEBU, Philippines — Hitsas na ang tanan alang sa 10th Mayor Alegado Cup Consolacion Fiesta Basketball League nga gikatakdang mosikad karong Septiyembre 1 didto sa Consolacion Sports Complex.

Matud pa ni league commissioner Paul Alelu Flores nga susama gihapon nga mga kategoriya sa miaging tuig ang kumbatihan ning higayona.

Kini mao ang open little mini (13-under), mini (15-under), ug midget (18-under) ug inter-barangay midget (18-under), Sangguniang Kabataan (SK) junior (21-under) ug senior.

Tataw nga ang open-commercial division maoy masentro sa atraksiyon ning usa ka bulan nga torneyo nga gituyo aron pagdugang og lamas sa tinuig nga pista sa Consolacion agi'g pagtamod sa minahal nilang patron nga si San Narciso unya sa Oktubre 29.

Ang sports committee nga mopadagan sa liga gipangulohan ni Consolacion SK Federation President Carlos Donn Flores. Ang iyang mga co-chairperson mao sila si Konsehal Marilou P. Casul, Victor Maglasang ug Benjamin 'Boy' Tibon ug Liga ng mga Barangay President Wesley Alimoren.

Ang mga duwa ubos sa superbisyon ni technical committee chief Aurelio Eslawan inabagan nilang SK chairmen Jasper Dayday ug Jeffers Cabahug.