CEBU, Philippines — Posible pa nga mag-abot og balik ibabaw sa ring sila si Floyd Mayweather Jr. ug Manny Pacquiao upat ka tuig sukad sa unang nilang engkuwentro.
Kini gumikan kay ning bag-o lang, si Mayweather mi-post og video sa iyang Instagram diin siya nag-training sud sa usa ka gym.
Ang 42-anyos nga si Mayweather wala na makaaway pa sukad iyang gipilde si Andre Berto niadtong 2015. Sukad niadto, nakaduwa lamang siya og duha ka exhibition fight diin iyang gipangpilde sila si Conor McGregor ug Tenshin Nasukawa nga pulos mga disipolo sa MMA.
Bisan sa iyang pang-edaron, si Mayweather makita nga solido ang porma ug kondisyon pa gihapon ang lawas.
Napaypayan sab og balik ang kainit sa gihandum nga 'rematch' human si international matchmaker Sean Gibbons nga mao karon ang tigpamada ug tuong kamot ni Pacquiao, nagkanayon nga wala sila'y gikainteresan karon kondili si Mayweather.