Luna sa finals tuyo target sa UV teams

CEBU, Philippines — Luna sa finals ang tirada sa ARQ Builders-University of the Visayas (UV) sa ilang pakigsangka batok sa tagsa-tagsa nila ka mga karibal sa crossover semifinals sa 2019 Cebu Schools Athletic Foundation, Inc. (CESAFI) Partner's Cup karong adlawa diha sa Cebu Coliseum.

Sa seniors division, ang Green Lancers makigtigi batok sa Cebu Landmasters-University of San Carlos (USC) Warriors sa main game sa alas 7:30 sa gabii, samtang ang Baby Lancers moharong batok sa Cebu Landmasters-Sacred Heart School-Ateneo de Cebu (SHS-Adc) Magis Eagles sa pasiunang duwa sa alas-6 sa gabii ubos sa juniors division.

Ang Green Lancers ug ang Baby Lancers parehong nagkupot og twice-to-beat advantage gumikan kay milugwa nga mga topseed human sa eliminasyon.

Gitak-op sa Lancers ang ilang kampanya bitbit ang 10-2 nga baraha, samtang ang Baby Lancers wa'y pilde sa walo ka duwa.

Lain pang mag-abot sa semis ugmang adlawa ang Southwestern University (SWU)-Phinma Cobras batok sa Joemang's Surplus-University of Cebu (UC) Webmasters ugn University of San Jose-Recoletos (USJ-R) Baby Jaguars batok sa Hotel Fortuna-UC Junior Webmasters.

Ang Cobras ug Baby Jaguars mao ang dunay twice-to-beat incentive.