Cebu lifters misidlak sa National Championships
CEBU, Philippines – Mipakita sa ilang kusog ang mga pambato sa Sugbo sa gipahigayong National 6-in-1 Weightlifting Championships kagahapon didto sa Manila.
Nangulo sa pagpanghakot og medalya mao si Giselle Ann Betua sa University of Cebu nga midaog sa secondary, youth ug open category sa girls 55 kgs. division. Ang iyang teammate nga si Febuar Ceniza mao ang naghari sa men's open 55 kgs. division sa iyang 255 kgs. total nga alsa.
Sa nindot nga gipakita sa duha, si coach Ramon Solis positibo nga makakuha og luna sa national team iyang mga batos aron morepresentar sa nasud sa Southeast Asian Games sa Nobiyembre diin ang Pilipinas ang host.
Gawas nila ni Betua ug Ceniza, laing upat ka mga Sugboanon ang misakmit og medalya sa nagkadaiya nilang dibisyon.
Si Fernando Agad mikabkab og duha ka bulawang medalya sa youth boys 49 kgs., samtang si Joefry Frasco miangkon og double-silver sa susamang dibisyon. Si Christnel Diamante misakmit og gold sa 55kgs. girls, samtang si Leonida Cambarijan mibingwit og silver sa juniod division.
- Latest