McAloney mibida sa Cebu Sharks

CEBU, Philippines — Si Fil-Australian William McAloney mikompleto sa krusyal niyang three-point play sa nahibiling tres segundos sa duwa aron aswaton ang Cebu Sharks ngadto sa kulbahinam nga  daog batok sa Iloilo United Royals,  69-68 sa 2019 Maharlika Pilipinas Basketball League (MPBL) Lakan Cup niadtong Lunes sa gabii didto sa Valenzuela Astrodome sa kaulohan.

Diriyot misukarap ang Sharks human mi-abante og otso puntos 61-53 human sa itsa ni  Edrian Lao sa katapusang 4:58 sa aksiyon gumikan kay ang Royals mibawos pinaagi sa 15-5 run aron ilogon ang labaw, 68-66  sa fade-away jumper ni Rodel Samboy de Leon sa mahibiling 48 segundos.

Human nabinayloay og mga sipyat ang isig ka habig, si McAloney misul-ot sa kapa sa usa ka bayani sa dihang mipasud kini sa iyang floating jump shot ug nakakubit pa og foul gikan ni Eric Rodriquez sa nahibiling tres segundos.

Sa dihang nagtabla ang iskor, 68-68, si McAloney kalmado nga mipasud sa iyang bonus free throw nga maoy nagpalangoy sa Sharks ngadto sa dagat sa himaya.

Duna pa unta'y tsansa ang Royals nga kawaton ang daog, apan si Al Francis Tamsi nasipyat sa iyang 3-pointer dayong kapupos sa oras.

Si McAloney mitapos uban ang 15 puntos ug siyam ka rebounds. Si Rhaffy October miamot og 11 puntos alang sa Sharks nga mipakgang sa duha ka sagunson nilang pilde aron tablahon ang ilang record ngadto sa 3-3.

Duna pa'y lain mga players nga maanindot og salida sa Sharks nga makigharong sunod sa Mindoro Tamaraws karong Hulyo 22 didto sa Pasig City Sports Complex.

Ang top gunner nga si Patrick Cabahug nalimitahan ngadto lamang sa otso puntos, apan dunay upat ka rebounds ug upat ka assists, si Lao mitali og nuybe puntos ug 10 ka rebounds, samtang si Victor Nunez mikamada og siyete puntos, pito ka assists ug lima ka rebounds alang sa Sharks.

Si De Leon mitagak og 20 puntos, lima ka rebounds ug tulo ka assists sa Royals nga nakatilaw sa ikaduha pa lamang nilang pilde sud sa lima ka duwa.